Ladki Bahin Yojana : मुख्यमंत्री देवेंद्र फडणवीस यांच्या नेतृत्वाखालील महायुती सरकारची २०२५ मधील पहिलीच मंत्रिमंडळ बैठक आज संपन्न झाली. खातेवाटप घोषित झाल्यानंतर मुंबईत घेण्यात आलेली ही पहिली बैठक असल्याने सर्वसामान्यांचे लक्ष या बैठकीकडे लागले होते. खातेवाटप होऊन आठवडा लोटल्यानंतरही काही मंत्र्यांनी पदभार स्वीकारलेला नसल्यामुळे ही बैठक खूप महत्त्वाची मानली गेली.
सरकारकडून सखोल तपासणी
यावेळी महिलांसाठी कल्याणकारी ठरलेल्या लाडकी बहीण योजनेविषयी (Ladki Bahin Yojana) महत्त्वाचे खुलासे झाले. महिला आणि बालकल्याण मंत्री अदिती तटकरे यांनी कॅबिनेट बैठकीनंतर योजनेच्या तपासणीसाठी सरकार कडक पावले उचलणार असल्याचे नमूद केले. तथापि, शासन निर्णयांमध्ये कोणतेही बदल होणार नसल्याचे त्यांनी ठामपणे सांगितले.
Ladki Bahin योजनेच्या लाभासाठी नवे निकष
लाडकी बहीण योजनेअंतर्गत महिलांना सध्या दरमहा ₹१५०० मिळत आहेत. मात्र, ही रक्कम लवकरच वाढवण्याची शक्यता असल्याचे संकेत मिळत आहेत. मात्र, अदिती तटकरेंनी योजनेसाठी लागू असलेल्या अटी स्पष्ट केल्या. आधार कार्ड व बँक खात्यांतील नावांमध्ये विसंगती असल्यास लाभ मिळणार नाही. शासकीय नोकरीत असलेल्या महिलांना देखील योजनेस अपात्र ठरवण्यात येणार आहे.
त्याशिवाय, दुचाकी किंवा अन्य वाहन नावावर असल्यास योजनेचा लाभ मिळणार नाही. या नियमांमुळे लाडकी बहीण योजनेचे फायदे पात्र महिलांपर्यंत योग्यरित्या पोहोचतील याची खात्री केली जाणार आहे.
मंत्रिमंडळ बैठकीतील अन्य महत्त्वाचे निर्णय
मुख्यमंत्री फडणवीसांच्या अध्यक्षतेखाली दुपारी १२ वाजता झालेल्या बैठकीत विविध मुद्यांवर चर्चा झाली. मुंबई जिल्हा मध्यवर्ती बँकेत शासकीय कर्मचाऱ्यांचे वेतन आणि भत्ते वितरीत करण्यासाठी वैयक्तिक खाते उघडण्यास अर्थ विभागाने मान्यता दिली.
तसेच, महाराष्ट्र जमीन महसूल संहिता, १९६६ च्या कलम २२० अंतर्गत सुधारणा करण्यात आली. शासकीय उपक्रमांच्या अतिरिक्त निधी गुंतवणुकीस परवानगी देण्याच्या प्रस्तावालाही मंजुरी देण्यात आली.
महाविकास आघाडीने याबाबत विरोध केला असला तरी, सरकारने सर्व निर्णय अत्यंत विचारपूर्वक घेतले असल्याचे दिसते.
